OʻQUVCHILARNING SOGʻLOM TURMUSH TARZINI SHAKLLANTIRISHDA MULTIPLATFORMADAN FOYDALANISH METODIKASI MODELI

Ushbu maqola Oʻzbekiston Respublikasining Taʼlim tizimini 2030-yilgacha rivojlantirish konsepsiyasida ilgari surilgan taʼlim sifatini oshirish va raqobatbardosh kadrlarni tayyorlash vazifalaridan kelib chiqqan holda, xususan, maktab oʻquvchilarining sogʻlom turmush tarzi (STT) koʻnikmalarini shakllantirishda zamonaviy multiplatformali metodika modelini ishlab chiqish va ilmiy asoslashga bagʻishlangan. Tadqiqotda modellashtirish pedagogik faoliyatning maqsadi va natijasini aks ettiruvchi asosiy vosita sifatida tahlil etiladi, shu bilan birga multiplatformali metodik tizimning pragmatik va tizimli-funksional nazariy asoslari tadqiq etiladi. Asosiy maqsad multiplatformadan foydalanish metodikasi modeli orqali oʻquvchilarning STTni samarali shakllantirish jarayonini boshqarishning maqsadga yoʻnaltirilganlik, nazariy-metodologik, mazmunli-jarayonli, tashkiliy va natijaviy kabi asosiy komponentlarini ochib berishdan iboratdir. Model tizimli-jarayonli, aksiologik, refleksiv va faoliyatga yoʻnaltirilgan yondashuvlar uygʻunligi asosida qurilib, u orqali 10-11-sinf oʻquvchilarida gnostik, axloqiy-irodaviy, kommunikativ va tashkiliy kabi muhim kompetensiyalar shakllantirilishi koʻrsatiladi. Tadqiqot natijalari multiplatformaning zamonaviy taʼlim muhitida STTni shakllantirishdagi ulkan salohiyatini ochib beradi va mazkur modelning amaliyotga joriy etilishi taʼlim jarayonining samaradorligini sezilarli darajada oshirishga xizmat qiladi.